سلسلہ کبائر [2] فہرست کبائر / حديث نمبر: 299

بسم اللہ الرحمن الرحیم

299:حديث نمبر

خلاصہء درس : شیخ ابوکلیم فیضی الغاط

سلسلہ کبائر [2]

فہرست کبائر

بتاریخ : 01/ صفر   1438 ھ، م  01، نومبر 2016 م

 عَنْ أَبِي هُرَيْرَةَ رَضِيَ اللَّهُ عَنْهُ، عَنِ النَّبِيِّ صَلَّى اللهُ عَلَيْهِ وَسَلَّمَ قَالَ: «اجْتَنِبُوا السَّبْعَ المُوبِقَاتِ»، قَالُوا: يَا رَسُولَ اللَّهِ وَمَا هُنَّ؟ قَالَ: «الشِّرْكُ بِاللَّهِ، وَالسِّحْرُ، وَقَتْلُ النَّفْسِ الَّتِي حَرَّمَ اللَّهُ إِلَّا بِالحَقِّ، وَأَكْلُ الرِّبَا، وَأَكْلُ مَالِ اليَتِيمِ،وَالتَّوَلِّي يَوْمَ الزَّحْفِ، وَقَذْفُ المُحْصَنَاتِ المُؤْمِنَاتِ الغَافِلاَتِ»

( صحيح البخاري : 2766 – صحيح مسلم : 89 )

ترجمہ : حضرت  ابو ہریرہ رضی اللہ عنہ سے روایت ہے کہ آپ ﷺ نے فرمایا : سات ہلاک کرنے والے گناہوں  سے بچو، صحابہ نے پوچھا اے اللہ کے رسول وہ کیا ہیں؟ آپﷺنے فرمایا: اللہ کے ساتھ کسی کو شریک کرنا ، ناحق کسی ایسی جان کوقتل کرنا جس کو اللہ نے حرام کیا ہے، سود کھانا، یتیم کا مال کھانا، کافروں سے لڑائی کے وقت پیٹھ پھیر کر بھاگ جانا، اور بھولی بھالی پاک دامن ایماندار عورت پر تہمت لگانا۔ صحیح بخاری و صحیح مسلم

تشریح : جیسا کہ یہ بات گزر چکی ہے کہ ہر وہ کام جس کا  اللہ تعالی نے  وجوبا حکم دیا ہے اس کا چھوڑنا اور جس چیز سے روکا ہے اس کا ارتکاب کرنا  معصیت  و گناہ  ہے ، پھر  ان گناہوں  میں  بعض  بڑے اور قبیح ہیں  جنہیں  شریعت  میں کبیرہ  کہا گیاہے اور بعض  قبح میں کم  ہیں تو انہیں  صغیرہ  یا سیئہ  سے تعبیر  کیا گیا ہے ، پھر ان کبائر میں بعض  بہت بڑے  ہیں جنہیں  اکبر الکبائر  کہا گیا ہے ۔  ایک  بار صحابہ کے ایک  مجمعہ میں نبی  ﷺ  نے تین بار ارشاد فرمایا  : کیا میں تمہیں  ان گناہوں  کے بارے میں نہ بتلاؤں  جو سب سے بڑ ے ہیں ؟  صحابہ نے عرض کیا :  اللہ کےر سول ! آپ ہمیں ضرور  آگاہ کریں ، آپ نے فرمایا : اللہ کے ساتھ شرک کرنا ، والدین  کی نافرمانی  کرنا ، آپ ٹیک  لگا کر بیٹھے  ہوئے تھے پھر  سیدھے  بیٹھ گئے اور فرمایا  : خبردا ر، اور جھوٹی گواہی دینا ۔ {صحیح بخاری و صحیح مسلم بروایت  ابو بکرہ }۔

اسی طرح کبیرہ گناہوں میں بعض گناہ  ہلاک و برباد کردینے  والے ہیں ، یا ان  سے نیکیاں  برباد  ہوجاتی ہیں،  جیسا کہ زیر بحث   حدیث میں ان  میں سے بعض کا ذکر  ہوا ہے ،  ان گناہوں  کی تعداد   بیس کے قریب ہے ، کبائر کے سلسلے میں ایک اور  بات دھیان  میں رکھنے کی ہے کہ  ہر کبیرہ کے لئے توبہ  ضروری ہے ، اگر کوئی  انسان بغیر  توبہ کے اللہ تعالی  سےجا ملتا ہے تو اس کا معاملہ  اللہ تعالی  کے سپرد   ہے چاہے تو بخش  دے اور چاہے تو سزا دے ، لیکن ان میں بعض  ایسے کبائر ہیں جو کبھی بھی معاف  نہ ہوں گے ، جیسے کفر   وشرک ، ارشاد باری تعالی ہے : إِنَّ اللَّهَ لَا يَغْفِرُ أَنْ يُشْرَكَ بِهِ وَيَغْفِرُ مَا دُونَ ذَلِكَ لِمَنْ يَشَاءُ الآية (48) اللہ تبارک وتعالی اپنے ساتھ شرک کرنے نہیں معاف کرتا اور اس کے علاوہ جو گناہ ہیں ان کو جس سے چاہے معاف کردے

نیزنبی ﷺ نے ارشاد فرمایا :  تو ان گناہوں سے بچتا رہ جو معاف نہ کئے جائیں  گے ، [جیسے ] مال غنیمت [عام مال] میں خیانت کیونکہ جو شخص اس میں خیانت  کرے گا تو اپنے خیانت کا مال لے کر قیامت کے دن حاضر ہوگا ، اور سود  کھانا اور جو شخص  سود کھاتا  ہوگا وہ قیامت  کے دن ایسا مجنوں اٹھایا جائے گا  جو گرتا پڑتا ہوگا ۔ الحدیث {الطبرانی الکبیر  بروایت  عوف بن مالک }  ۔کبیرہ گناہوں کی تعداد بہت زیادہ ہے ، چنانچہ ایک بار عبد اللہ بن عباس رضی اللہ عنہما

سے  سوال  کیا گیا  کہ کیا کبیرہ  گناہوں کی تعداد سات ہے  ؟  حضرت ابن عباس  کا جواب تھا کہ ان کی تعداد ستر کے قریب ہے  ۔ { الکبائر للذھبی }